Presidenti i Këshillit Evropian, Antonio Costa, ka nisur sot një turne diplomatik në Ballkanin Perëndimor, duke theksuar përkushtimin e palëkundur të Bashkimit Evropian ndaj procesit të zgjerimit në rajon. Vizita vjen si një hap thelbësor për të forcuar bashkëpunimin ndërmjet BE-së dhe vendeve të rajonit.
Në ndalesën e parë sot në Tiranë, Costa u takua me Presidentin e Shqipërisë, Bajram Begaj, dhe Kryeministrin Edi Rama. Ai gjithashtu zhvilloi një bashkëbisedim me studentët e Kampusit të Tiranës të Kolegjit të Evropës. Pas Tiranës, zyrtari i lartë evropian udhëtoi drejt Shkupit për t'u takuar me Kryeministrin Hristijan Mickoski.
Nesër, më 3 qershor, Presidenti Costa do të vizitojë Prishtinën. Sipas agjendës, ai do të takohet me Presidenten në detyrë, Albulena Haxhiu, Kryeministrin në detyrë, Albin Kurti, si dhe me liderët e partive opozitare.
Turneu do të vazhdojë të enjten, më 4 qershor, në Beograd, ku Costa do të zhvillojë bisedime me Presidentin serb, Aleksandar Vuçiq, Kryeparlamentaren Ana Bërnabiq dhe përfaqësues të shoqërisë civile.
Vizita do të përmbyllet më 5 qershor në Mal të Zi, ku Costa do të bashkëkryesojë Samitin BE-Ballkani Perëndimor. Tema qendrore e këtij samiti është "Prosperiteti dhe stabiliteti i përbashkët i BE-së dhe Ballkanit Perëndimor". Kjo vizitë shihet si një sinjal i qartë se zgjerimi mbetet prioritet strategjik për Brukselin.
