Në një deklaratë të dhënë të martën, zëdhënësja e LSDM-së, Bogdana Kuzeska, e cilësoi qasjen e qeverisë ndaj integrimeve evropiane si një "politikë të qartë antievropiane dhe antiperëndimore". Ajo akuzoi kryeministrin Hristijan Mickoski dhe zyrtarin qeveritar Ivan Stoilkoviq për sabotim të reformave.
Sipas LSDM-së, qeveria po zhvillon një "lojë të dyfishtë". Kuzeska pohoi se, derisa qeveria premton anëtarësimin në Bashkimin Evropian, në prapavijë ajo po forcon lidhjet me Kinën dhe interesat ruse.
"Kjo nuk është diplomaci. Qytetarët e shohin qartë se Mickoski me njërën dorë premton BE-në, ndërsa me tjetrën punon për autokracitë", deklaroi Kuzeska. Ajo shtoi se ky grup në pushtet po kërkon izolimin e vendit për të shmangur sundimin e ligjit.
Këto akuza vijnë në një kohë kur Maqedonia e Veriut përballet me bllokadë në procesin e integrimit evropian, për shkak të mosmarrëveshjeve për ndryshimet kushtetuese. Opozita vazhdon të kërkojë përgjegjësi nga qeveria për ngecjen e procesit të integrimit.
