Banorët e zonës kanë ngritur shqetësime serioze për një kundërmim të vazhdueshëm dhe të rëndë të ajrit përgjatë rrugës që lidh të ashtuquajturin "Rrethi i Madh" me "Rrethin e Ismetit" në Prishtinë.
Sipas dëshmive të qytetarëve, kjo gjendje është prezente prej rreth dy deri në tre muaj. Ky fenomen e ka bërë lëvizjen në këtë segment rrugor shumë të pakëndshme dhe sfiduese, veçanërisht për këmbësorët dhe drejtuesit e automjeteve që qarkullojnë aty çdo ditë.
Nëpërmjet një ankese drejtuar autoriteteve, qytetarët kërkojnë ndërhyrje të menjëhershme për të identifikuar shkakun e kësaj ndotjeje. Ata shpresojnë që institucionet përkatëse të marrin masa urgjente për të përmirësuar cilësinë e ajrit dhe për të eliminuar burimin e këtij kundërmimi që po cenon jetën e përditshme të banorëve.
