Управата за хидрометеоролошки работи (УХМР) најави дека нестабилното време ќе се задржи до крајот на неделата. Иако претпладнето ќе биде променливо облачно со сончеви периоди, попладневните часови ќе донесат локална нестабилност проследена со пороен дожд, грмежи и засилен ветер.
Денес, во западните делови од земјата се очекува засилен западен ветер, кој повремено ќе надминува брзина од 60 километри на час. Утринските температури ќе се движат од 10 до 16 степени, додека максималните дневни ќе достигнат од 20 до 32 степени Целзиусови.
Во Скопје се очекува слично време. Иако ќе има сончеви периоди, попладне во делови од котлината постојат услови за краткотраен дожд и грмежи. Максималната дневна температура во главниот град ќе изнесува околу 30 степени.
Според УХМР, најострите временски промени се очекуваат во четврток и сабота. Во овие денови, процесите локално ќе бидат поинтензивни, со можност за пообилни врнежи и појава на град. Се препорачува претпазливост за време на попладневните часови кога времето станува најнестабилно.
