Sulmuesi nigerian Victor Osimhen ka reaguar ndaj valës së spekulimeve për të ardhmen e tij, duke mohuar kategorikisht se është pranë largimit nga Galatasaray. Lojtari ka zgjedhur rrjetet sociale për t'i dhënë fund zërave që kanë qarkulluar ditët e fundit.
Shkak për këto raportime u bënë deklaratat e trajnerit të kombëtares së Nigerisë, Eric Chelle. Mediat kishin interpretuar fjalët e tij si një sinjal se Osimhen po planifikon të largohet nga gjiganti i Stambollit gjatë kësaj vere.
Përmes një postimi në Instagram, Osimhen sqaroi se këto komente janë nxjerrë jashtë kontekstit dhe janë ekzagjeruar nga mediat. Ai theksoi se trajneri Chelle e respekton Galatasarayn dhe se nuk ka pasur kurrë qëllim për të krijuar polemika.
Me këtë reagim, ylli nigerian ka kërkuar të qetësojë tifozët e klubit turk. Mesazhi i tij lë të kuptohet qartë se nuk ekziston asnjë vendim për largim dhe se ai mbetet i përqendruar te detyrat e tij aktuale në Stamboll.
