Gjykata e Posaçme ka marrë një vendim të ndërmjetëm duke ndaluar praninë e gazetarëve në procesin gjyqësor penal që lidhet me hakerimin e e-maileve të prokurorëve të SPAK. Ky është një rast i paprecedentë, ku gjyqi në fazën e themelit zhvillohet në terr informativ.
Togat e zeza pranuan kërkesën e prokurorit Bledar Maksuti, duke argumentuar se mbyllja e procesit është e domosdoshme për të ruajtur sekretin hetimor, pasi dosja është e ndarë me fraksion dhe përmban të dhëna mjaft sensitive.
Të pandehurit dhe akuzat
Në këtë proces gjykohen tre persona të akuzuar për grup të strukturuar kriminal, përgjim të paligjshëm dhe hyrje të paautorizuar kompjuterike:
- Agim Ismaili, ish-drejtor i përgjithshëm i burgjeve.
- Zambak Gjoni, ish-zyrtar i administratës së burgjeve.
- Arnold Rrokaj, ish-punonjës pranë IMT.
Hetimet tregojnë se Arnold Rrokaj ka aksesuar në mënyrë të paligjshme materiale hetimore të SPAK. Këto materiale dyshohet se u janë përcjellë më pas Gjonit dhe Ismailit, të cilët i kanë shpërndarë te persona të tretë.
Detajet e sulmit kibernetik
Sulmi ndaj SPAK ndodhi më 12 mars 2025. Hakerët arritën të merrnin informacion nga e-mailat e prokurorëve Behar Dibra, Enkeleida Millonai dhe Elida Kaçkini. Megjithatë, struktura e posaçme konfirmoi se sulmuesit nuk arritën të depërtojnë në sistemin e brendshëm të IT-së.
