Високите цени на горивата станаа сериозен предизвик за граѓаните на Северна Македонија, кои оценуваат дека моменталните трошоци се превисоки во споредба со нивниот животен стандард.
Во анкетите, граѓаните посочуваат дека со сегашните примања, особено со пензиите од околу 250 евра, користењето на автомобил станува речиси невозможно. „Со овој стандард што го имаме, едвај се преживува, а за гориво не може ни да се размислува“, велат револтираните граѓани.
Иако властите постојано тврдат дека земјата има најниски цени во споредба со регионот, претходните владини мерки, како намалувањето на ДДВ-то, се веќе укинати. Во моментов, на сила останува само намалената акциза за дизелот.
Неодамна, најголемиот снабдувач со горива, „ОКТА“, најави намалување на цената за два денари по литар, но само за бензинот. Граѓаните сметаат дека овие чекори се недоволни и очекуваат посериозни мерки од државата за подобрување на куповната моќ.
